1. Unsa man kining gitawag nga “internet forum” sama sa Wahig.net?

Isip teknikal nga kahulogan, ang internet forum usa ka web application o web software
nga gitumong sa pagpahigayon og mga kulukabildo online ug nagtugot sa
mga users sa pagpadangat sa ilang mga mensahe ug pag-apil sa
nagapadayong hisgutanan ginamit ang usa ka web browser sama sa Internet Explorer, Mozilla Firefox, Netscape, Opera ug uban pa. Gitawag usab kini sa laing mga ngalan sama sa web forum, message board, discussion board, electronic discussion group, discussion forum, bulletin board, ug ang pinakadali ug simple…, forum.
Laktod nga pagkasulti, ang internet forum namugna aron sa pagpahigayon
sa binayloay ug huna-huna mahitungod sa bisan unsang tema og hisgutanan
pinaagi sa kahimanan sa internet. Sa pagpadayon sa paglambo sa mga
kahimanan sa internet, napahigayon usab ang pagpadangat diha sa forum
sa ubang matang sa mga media sama sa videos ug images. Dili lamang mga mensahe ang mahimong ipadangat kun dili mga video clips ug hulagway agig pagdugang ug kinabuhi sa mga binayloay sa huna-huna.

2. Online communities, virtual relationships?

Nagpuyo kita sa kapanahonan nga naghagit sa mga karaang pamaagi sa pagsabot ug pagtuon sa realidad. Globalization,
matod pa sa pinulongang ingles. Ang mga naandang pamaagi sa pagtutok sa
sitwasyon, sa makausa pa, gihagit ug nahimutang sa way kaseguroan
susama niadtong paghagit ni Copernicus sa kanhiayng baroganan sa
simbahan nga ang planetang earth mao ang sentro sa uniberso. Dili na
igo ug dili na makatagbaw sa yanong lumulopyo ang naandan ug
tradisyonal nga pamaagi. Nasinati nato karon niining maong siglo ang
pagbuto ug ang pagkuyanap sa teknolohiya isip bag-ong medium o
pamaagi sa pagpakiglambigit. Ug kini daw sa usa ka makusog nga bulhog
ug sulog nga sa dili madugay mobanlas sa tanang suok sa kalibutan.
Malisud kapugngan ang sulog sa teknolohiya, ug sa madugay o sa madali,
wala kita’y laing kapaingnan kun dili ang paghangop niini sama nga
gihangop nato ang matag dalit sa kabag-ohan nga gitanyag ning moderno
nga kalibutan.

Nan, niining kalibutan nga ‘nagkagamay’ ug
nagkasentralisado, ang pamaagi usab sa pagpakig-ingon ingon ug
pakighugoy-hugoy nabag-o. Matawag ba nga relasyon ang mga paghimamat
nga nahitabo sa cyberspace? Aduna bay relasyon nga gipanday diha sa mga chatting
ug binaylo-ay sa huna-huna diha sa mga forums ug blogs? Aduna bay
elemento sa relasyon diha sa pagpasundayag sa imong kaugalingon, sa
imong mga taras, mga hulagway, mga higala ug kaila diha sa Friendster, Facebook, Myspace, Multiply ug uban pang susama niini?

Nasayran
nato nga ang pagpangalagad kinahanglang nakasukad sa realidad sa
katawhan, sa kahimtang sa atong gialagaran. Nan, kun mao kini ang
kahimtang sa kalibutan wala kitay laing kapilian kun dili ang pagsabot
ug pagpaningkamot sa pagsangway sa ebanghelyo ni Kristo taliwa ug
pinasikad sa maong kahimtang.

3. Ang Wahig.net

Kining atong forum nagdala sa opisyal nga site name: Wahig.net. Ang unang bahin sa site name nga mao ang pulong Wahig. Kini gipili tungod kay kini naggikan sa ngalan sa sikat nga suba sa Sierra Bullones nga mao ang Wahig River. Napili kining maong pangalan tungod na hunahuna nga kini maoy usa sa mga trade mark sa maong lugar. Maoy tinguha niining maong forum ang pagpanday ug komunidad sa mga Sierra Bullonesanon ug sa ilang mga kahigalaan kalibutan
nga adunay kahimanan sa internet aron magpaambitay, maghibaw-anay,
maglig-onay panahon sa mga pagsulay, kamingaw ug kagul-anan, ug labaw
sa tanan magtambayayong niining atong pagpaningkamot sa pagsubay sa
madanlog nga dalan padulong kang Kristo.

Nahimugso kining atong
forum tungod sa pagpaningkamot nga mas mabulokon pagsaulog sa Diamond celebration sa pagka parokya sa Imaculada Conception sa Sierra Bullones. Kini aron usab ma updated ang mga membro sa mga kalihukan. Apan dili ikalimod nga taliwa niining tanan, ang
forum, labaw sa tanan, usa ka kasinatian sa pag-inambitay. Nagsugod
kita sa paaging inato ug yano – mga komedya, mga daw sa way hinungdang
hilisgutanan. Apan kining tanan kalabot sa usa ka normal nga proceso sa
pagpanday ug relasyon. Sama sa usa ka pamilya, nag-aginod kita sa atong
panaw ug sa maong dalan mahimamat ang nagkalain-laing kasinatian ug mga
hagit – kalipay, hudyaka, kasub-anan, kaligutgot, way pagsinabtanay,
panagbingkil. Apan dinhi mapatunhay ang katahom sa tawhanong
pakiglambigit. Nagmatuod kini sa ulohang kamatuoran sa atong tawhanong
kahimtang – unique ug lahi ang matag binuhat.


4. Nganong Internet Forum?

Ang nakapahimong lahi ug unique sa mga internet forums mao ang ilang interactive character.
Sanglit nahimugso ang internet forums sa katuyoan nga mapahigayon ang
binaylo-ay sa hunahuna, mahinungdanong elemento ang pagpasayon sa
pagpadangat sa mga mensahe or postings ni bisan kinsang
miyembro sa forum. Buot ipasabot nga bisan kinsa nga miyembro mahimong
mosugod og hilisgutanan ug mahimo usab nga motubag sa nagapadayong
hilisgutanan. Dili susama sa ubang online sites of encounters sama sa Friendster, MySpace, Multiply, Facebook ug uban pa nga mas personal ang kinaiya ug gidumala sa usa lamang ka webblogger (ang tag-iya sa account), ang internet forums mas makatilingbanon ang taras. Labot pa, ang nahinganlan nga mga sites nakasentro sa pagpromote sa personal nga profile ug mga kalihukan sa tag-iya sa account ug bisan tuod naninguha sa pagtigom sa mga higala ug kaila, ang tanang online movements nanukad sa usa lamang ka user. Kun ikompara sa usa sa mga leading profile sites, ang Friendster, maingon nga ang forums mas nakapunting sa social interactions samtang ang Friendster mas personal ang nature.

Ang mga electronic online groups or eGroups sama sa Yahoo eGroup aduna usa’y dakong limitasyon tungod kay kini sila email account-based – ang mga mensahe adto madawat ug mosulod sa inbox sa email account, ug mamahimong makapuno sa allotted space sa inbox mao nga gikinahanglan ang pag-anam ug delete sa mga mensahe nga madawat gikan sa ubang sakop sa usa ka eGroup. Gawas pa ang pagpadangat sa ubang media types sama sa mga video clips ug images dili dayon accessible. Gikinahanglan pa ang pag-abli sa laing mga links aron matan-aw ang maong mga media formats.

Ang
mga internet forums, sa laing bahin, walay limit sa mga mensahe nga
mahimong i-post ug dili kinahanglan nga anamon kini sa pagdelete.
Mahimong pasagdan hangtud sa hangtod ug walay mahitabo nga space usage error, hinuon adunay limit sa mga media types nga mahimong i-upload apan ang pagpost sa mga media types walay limit.

Kung online interactions ang
atong gipangita ug tuyo wala nay mas ha-om alang sa maong katuyoan kun
dili ang internet forum. Busa, unsa pay imong gipaabot, parehistro na
ug dayon sa atong forum!

WELCOME!